बागलुङ । धेरै युवाहरु वैदेशिक राेजगारकाे तानाबानामा विदेश सपनामा लागिपरेका छन् । जसले स्वदेशमा केही गर्ने आधार नै नदेखेर जसरी र जे गरि हुन्छ परदेशिन पाए हुन्थ्याे भन्ने सपना साँचेका छन् । तर बागलुङका एक युवा भने हुँदाखाँदाेकाे जापान बसाइ छाेट्टाएर एकदिन नेपाल फिरे ।
गाउँ छाडेर जापान जाने गलकोटे युवाको जमातका बीच उनी स्वदेश फर्केर केही गर्न चाहान्थे । धेरैले उनलाइ जापान छाेडेर आएकाेमा गाली पनि गरे । तर ती सवकाबीच उनले गाउँ फर्केर बाख्रापालन सुरु गरेका छन् । गलकोट नगरपालिका–५ भैँसे बाँसबारीका रमेश बस्नेतले आठ वर्षको जापान बसाइ टुङ्ग्याएर बाख्रापालन व्यवसाय थालेका हुन् ।
गाउँका युवाको लहैलहैमा जापान पुगेका उनी अहिले गाउँमै फर्केर पेशा व्यवसायमा रमाउन थालेका हुन् । आठ वर्ष अगाडि विद्यार्थी भिसामा जापान पुगेका उनले त्यहाँ विभिन्न दुःखकष्ट सहनुपर्यो । विदेशमा निकै दुःख गरेका उनले अहिले गलकोट–९ गल्याङमा व्यावसायिक बाख्रापालन सुरु गरेका छन् । उनले व्यवस्थित खोर बनाएर अहिले माउ बाख्रा र पाठापाठीको व्यवस्थापन गर्दै छन् ।
व्यवसायी बस्नेतले प्रविधिक शिक्षा हासिल गरे पनि पेशा भने किसानको अँगालेका छन् । पोखरा इञ्जीनियरिङ कलेजबाट डिप्लोमा इञ्जीनियरिङ अध्ययन गरेका उनले पढाइ र पेशा भन्ने विषय फरक भएको बताउँछन् ।
“पढाइ र पेशा भन्ने विषय हाम्रोजस्तो मुलुकमा नितान्त फरक छ, पढाइअनुसारको जागिरको ग्यारेन्टी छैन, दुःख गरेर पढ्यो, कि त विदेशिनुपर्छ कि अरु कुनै पेशा समात्नु पर्छ”, उनले भने, “ म इञ्जीनियरिङ हुँ, यसअनुसारको जागिर पाउन मुस्किल पर्छ ।”
उनले गल्याङगाउँमा रु ६० लाख लगानीबाट बोयरजातका बाख्रापालन व्यवसाय सुरु गरेका छन् । उनको फार्ममा अहिले साना–ठूला गरी ३३ बाख्रा छन् । बाख्रापालनमा भविष्य खोजिरहेका ३२ वर्षीय बस्नेत डिप्लोमा इञ्जीनियरिङ अध्ययनपश्चात विदेश गएका थिए । फार्म स्थापना गरेको ठाउँ बाख्रापालनका लागि अति उपयुक्त छ र घाँसपातको राम्रो व्यवस्था भएको उनको भनाइ छ । उनले भने, “विदेशमाजस्तो दुःख गाउँ गरे यहाँ पनि मनग्य आम्दानी गर्न सकिन्छ ।” व्यवसायी बस्नेतले आफू सुरुमा साथीहरूको लहलहैमा लागेर जापान गएको जनाउँदै अब आफू गाउँमै उद्यमी बन्ने बताउँछन् ।
